Kontrolli i Lartë i Shtetit ka nxjerr zbuluar kryebashkiakun Erion Veliaj sa i përket menaxhimit të mbetjeve, sepse ndryshe nga sa deklaron ai, raporti thotë që bashkia Tiranë ka qenë më pak efektive në këtë detyrë. KLSH thotë se, gjendja e qytetit është shumë rëndë nga mbeturinat që grumbullohen në vende pa kriter. Sidomos në zonat më periferike të qytetit.
“Nga vëzhgimet e grupit të auditimit në terren në territorin e Bashkisë Tiranë, vërehet se infrastruktura e vendgrumbullimeve të mbetjeve ndryshon dukshëm sa më shumë që të largohemi nga qendra e qytetit.
Sa më shumë largohemi nga qendra e qytetit, aq më pak e organizuar dhe e mirëmbajtur është infrastruktura për grumbullimin e ndarë të mbetjeve. Në vijimësi të problematikave me ndarjen e mbetjeve në rryma të ndryshme vjen edhe grumbullimi i tyre nga e njëjta makinë grumbullimi”, thuhet në raport.
Ndërkohë edhe pse Bashkia paguan miliarda lekë për koncesionarët që merren me menaxhimin e mbetjeve në qytet, situata vazhdon të jetë shumë e keqe.
Pak kohë më parë bashkia vendosi të shpenzojë rreth 2 miliardë lekë të vjetra për kontejnerë dhe sistem të mbledhjes së mbeturinave me teknologji të re, duket rritur ndjeshëm kostot për banorët e kryeqytetit, të cilët paguajnë rreth njëzet milionë euro të tjera në vit për menaxhimin e mbetjeve.
Po ashtu, nga taksat e qytetarëve të Tiranës paguhen rreth 10 milionë euro në vit për pastrimin, pas një tenderi gjigand mbi 30 milionë euro, të zhvilluar nga në janar të këtij viti, për shërbim 3-vjeçar.
Por, ku shkojnë këta para?! Pasi KLSH nga auditimi i tre viteve të fundit ka evidentuar se koshat e mbeturinave nuk janë në formën e duhur, nuk janë të mjaftueshëm për të mbuluar zonat si dhe nuk janë të klasifikuar për kategori të ndryshe mbetjesh.
“Nga dhjetëra vëzhgime që ka bërë në terren, në qytetin e Tiranës, grupi i auditimit ka konstatuar problematikë të theksuar lidhur me organizimin e kontejnerëve në vendgrumbullimet e mbetjeve apo dhe problematika të tjera, si për shembull: Kontejnerë të amortizuar; Kontejnerë vetëm për një lloj rryme mbetjesh; Kontejnerë që nuk e kanë të dukshëm emërtimin; Mbetje plastike dhe të rrymave të tjera jashtë kontejnerëve; Hedhja e mbetjeve jo në kontejnerët e duhur;
Prania e individëve në vendgrumbullimet e mbetjeve që kryejnë aktivitetin e grumbullimit të plastikës apo llojeve të tjera të mbetjeve”, thekson KLSH.
Në përfundim, KLSH konstaton se, Bashkia Tiranë nuk ka ngritur
infrastrukturën e duhur për të mundësuar grumbullimin e diferencuar të mbetjeve në kundërshtim me VKM nr. 418 datë 25.06.2014 “Për grumbullimin e diferencuar të mbetje venë burim”. Gjithashtu, nuk ka marrë masat e përshtatshme për grumbullimin e diferencuar të mbetjeve.
