Aldi Rama, i riu që ekzekutoi oficerin e krimeve në Lezhë, Saimir Hoxha dhe më pas vrau veten në një banesë të rrethuar nga forcat speciale RENEA rezulton se disa muaj më parë ishte dhunuar nga efektivët e policisë gjatë arrestimit të tij për kanabis. Detajet e reja janë zbuluar nga prokuroria e Lezhës, ku disa muaj më parë, Aldi Rama kishte bërë kallëzimin përkatës. Sipas burimeve nga organi i akuzës, kallëzimi është bërë në kohën kur i riu ishte në burg me pretendimin se ishte dhunuar e keqtrajtuar nga uniformat blu, kur u arrestua me lëndë narkotike dhe armë të ftohtë.
Madje, për këtë kallëzim, prokuroria e Lezhës ka regjistruar dhe një procedim penal për veprën penale “Kryerja veprimesh arbitrare”, por që ende nuk ka një autor për dhunën e ushtruar ndaj tij. Në lidhje me këtë çështje hetimet po drejtohen nga prokurori Françesk Ganaj dhe sipas burimeve janë marrë në pyetje efektivë dhe oficerë të Policisë, të cilët kishin bërë ndalimin e Aldi Ramës. Gjithashtu, më herët është bërë edhe ballafaqimi i të riut me tre efektivët e Policisë, të cilët pretendonte se e kishin dhunuar. Por, Prokuroria nuk ka arritur të provojë ende pretendimet e 21-vjeçarit Aldi Rama, pasi ky i fundit fillimisht e kishte referuar rastin te punonjësit e burgjeve dhe pas 2 muajsh ka bërë kallëzimin penal dhe për këtë çështje nuk ka një raport mjekoligjor.
Në këto kushte, prokuroria po verifikon nëse ngjarja e dhunimit gjatë arrestimit dhe ajo e vrasjes së oficerit Saimir Hoxha kanë lidhje mes tyre, apo e gjitha ka ardhur për shkak të mllefit të akumuluar të të riut ndaj uniformave blu. Oficeri i krimeve në Policinë e Lezhës, Saimir Hoxha, u ekzekutua nga Aldi Rama paraditen e 28 shtatorit, kur policia ndaloi makinën e drejtuar prej tij. Policia mendohet se i ka kërkuar mjet identifikimi Ramës, ndërsa ai i ka qëlluar me armë. Më pas, ai u largua nga vendi i ngjarjes, por pas pesë orësh ndjekje nga forcat RENEA u vetëvra me një plumb në kokë.
