Nesër me 17 tetor në Kosovë do të zhvillohen zgjedhjet lokale, ndërsa këto javë janë shfrytëzuar nga garuesit për fushatë elektorale, të cilat nuk kanë shkuar ashtu siç duhet. Në këtë përfundim ka dalë Rrjeti i organizatave që merret me monitorimin e zgjedhjeve në Kosovë, Demokracia në Veprim, e cila përmes një deklarate tha se janë shkelur nga të gjitha partitë rregullat anti-covid dhe është e mira që ata ta mbajnë përgjegjësi për këtë. Sipas saj më e mira do të ishte që të gjithë të bënin fushatë online.
Ndër të tjera, organizata thekson se gjatë fushatës ka pasur mungesë të theksuar transparencë në shpërndarjen e fondeve të ndara për fushatë.
“Platformat ‘Facebook’ dhe ‘Instagram’ janë shfrytëzuar masivisht nga kandidatët për kryetarë të komunave dhe për ata për kuvendet komunale për plasim të informatave, shpalosje të ofertave programore, shpalosje të aktiviteteve e thirrjeve për votim. Ndonëse shumica dërrmuese e këtyre postimeve ishin të sponsorizuara, transparenca për koston financiare të fushatave digjitale mungon”, thuhet në deklaratë.
Komisioni Qendror i Zgjedhjeve në Kosovë (KQZ) ka nisur të shtunën që të shpërndajë materialin zgjedhor, përfshirë fletëvotimet – për zgjedhjet lokale që do të mbahen më 17 tetor.
Qytetarët e Kosovës do të zgjedhin kryetarët e rinj dhe asambletë komunale në 38 komuna. Sipas KQZ-së, numri i qytetarëve me të drejtë vote është 1 milion e 885 mijë e 448 votues. Në këto zgjedhje, qytetarët do të mund të votojnë për kryetarin e komunës dhe një asamblist.
