Vetëm pak javë më parë vetë kryeministri, Edi Rama, ka publikuar video nga përfundimi i punimeve të një rruge në Librazhd, por asfaltit është shkatërruar totalisht. Bëhet fjalë për aksin rrugor Babje-Polis, për të cilën banorët që e përdorin çdo ditë thonë se është një projekt i dështuar dhe me kaq nga sa ishte më parë.
Për një prononcim për media banorët e zonës atje thonë që prej fillimit dukej që rruga nuk ishte e punuar siç duhet dhe nuk kishte ndriçim. Kjo kthesë pranë ish-divizionit ose siç njihet nga banorët kthesa e lagjes Semës është kthyer në burim aksidenti. Banorët thonë se mund të devijohej.
“Rruga ka disa rrëshqitje dhe ka ngushtime trotuaresh, ndriçimi ka dy muaj që është bërë po dritat nuk janë ndezur. Kryqëzimi këtu është një nga burimet më të këqija të aksidenteve. Kur vijmë nga qyteti nuk dimë si të kthehemi. E kam pësuar dhe unë disa herë. Degëzimi i kthesës nuk është bërë ku duhet. Pak më lartë mund të shikosh lapidarë që kanë ndodhur fatkeqësi prej rrugës. Nuk kuptojmë kush e si e projektuan. Është katastrofë. Ka plot njerëz që kanë mbetur sakatë”, u shpreh një banor.
Rikonstruksioni rrugës Babje-Polis me vlerë rreth 203 milionë lekë me TVSH nisi nga Kompania Vëllezërit Hysa në gusht të 2020. Punimet sipas afatit duhet të përfundonin në shkurt të këtij vit, ky afat jo vetëm që nuk u respektua, por rruga po degradon çdo ditë e më shumë.
