Ministrja e Ekonomisë Delinda Ibrahimaj ka njoftuar se çmimi i energjisë do të rritet në bizneset e mëdha. Në kushtet e krizës energjetike që ka prekur gjithë vendet, ajo argumenton se jo më kot këto biznese do të preken nga rritja e çmimeve pasi në këtë kategori, futen kosto prodhimi dhe kosto për konsumatorin. Ndërsa ka theksuar se nuk do të ketë rritje të çmimit të energjisë për familjet dhe biznesin e vogël.
“Kjo kategori biznesesh në bazë të vendimit që do të merret nga MIE pasi nuk është një vendim që merret nga MFE, patjetër që do të ketë një rritje të çmimeve të energjisë për biznesin e madh dhe patjetër që kjo kosto do të transferohet në çmime të konsumatorit sepse është një çmim prodhimi i cili do të transferohet pjesërisht tek konsumatori” tha ndër të tjera.
Ndër të tjera ministrja bëri të ditur se për ta “përballuar” këtë krizë energjetike është dhënë një fond për 200 milion euro nga qeveria për Operatorin e Shpërndarjes së Energjisë.
Sipas saj sasia e kërkuar prej 200 milionë euro do të jetë një pjesë për periudhën muajit tetor-nëntor dhe pjesa tjetër do të jetë për 6 mujorin e parë të vitit të ardhshëm.
