Po vijon procesi i votimit edhe në Maqedoninë e Veriut, teksa deri në orën 13:00 kanë votuar 21% e qytetarëve. Mosfunksionimi siç duhet i pajisjeve biometrike, bëri që ky proces të niste me probleme. Tashmë procesi ka vijuar i qetë dhe pa probleme.
Sipas autoriteteve zgjedhore njoftohet se në 6 komuna nga 80 që janë gjithsej, votimi po zhvillohet sipas mënyrës së vjetër. Në 11 komuna procesi u ndërpre për më shumë se një orë dhe do të shtyhet deri në 21:00 të mbrëmjes.
Për kryetarë të komunave garojnë 299 kandidatë dhe 577 lista këshilltarësh me 10 600 kandidatë. Gara kryesore është ajo mes LSDM-së dhe BDI-së, që janë në pushtet dhe partive opozitare, VMRO-DPMNE dhe Aleanca për Shqiptarët dhe Alternativa.
Partitë shqiptare do ta zhvillojnë garën për qytetet me shumicë shqiptare si Tetova, Gostivari, Çairi, Kërçova, Struga, Dibra si dhe disa komuna.
