Deputeti i Partisë Demokratike, Flamur Hoxha, në një postim në facebook, është shprehur se mungesa e të ardhurave për nevojat bazë të familjeve kuksiane, kanë sjellë krizë mbijetese. Sipas tij, kjo është një fatkeqësi që kërkon vëmendjen e qeverisë.
“Mungesa e te ardhurave për ushqimet e përditshme e nevojat bazë për çdo familje kuksiane kanë sjellë në krizë mbijetese ato pak biznese në këto vite rilindje, ku suksesi i çdo biznesi të vogël mbetet një rrogë minimale e vetëm njërit prej të punësuarve familjarë. Nëse ia del të paguajë mallin e akumuluar të pashitur, qiranë, energjinë e shtrenjtë që shpesh mungon, taksat dhe se fundmi kostot e fiskalizimit të pamundur për secilin që takuam dhe biseduam gjatë.
Ky është fatkeqësisht realiteti ynë që kërkon vëmendjen e qeverise që duhet t’i shërbejë të gjithë qytetarëve të vendit” – shkruan Hoxha.
Deputeti i PD për qarkun e Kukësit, u bën thirrje kolegëve të tij të zbresin tek qytetarët dhe ta shohin këtë si një emergjencë kombëtare në prag dimri.
“I bëj thirrje gjithë deputeteve të zbresin tek votuesit dhe qytetarët e tyre në çdo cep të Shqipërisë të shohin këtë realitet, si një emergjencë kombëtare në këtë prag dimri ku vështirësitë prej motit do jenë në përkeqësim dhe ku tashmë emigrimi ka boshatisur jo vetëm Kukësin. Të bëhemi bashkë në presionin kundër qeverisë dhe të mos lehtësojmë qeverinë e cila synon të na kundër vendosë kundër njeri tjetrit me misionin e saj historik të përçarjes së shqiptarëve” – shkruan më tej Hoxha.
Hoxha e mbyll reagimin e tij duke thënë se kjo është jeta reale përtej ekraneve mashtruese, përtej rrjeteve sociale, është në supet e kryefamiljarëve që luftojnë për mbijetesë, të papunë dhe fëmijë qe iu largohen çdo ditë.
