Vijon ende procesi i numërimit të votave në Kosovë, ku aktualisht raportohet se janë numëruar 99.8% e tyre.
Komisioni Qendror i Zgjedhjeve në Kosovë ka publikuar rezultatet paraprake të zgjedhjeve lokale që u mbajtën ditën e diel. Bazuar në të dhënat e KQZ, 17 komuna në Kosovë tashmë e kanë një fitues, ndërsa 21 të tjera do të shkojnë në raundin e dytë të balotazhit.
Partia Demokratike e Kosovës ka marrë katër komuna; Mitrovicën, Ferizajn, Hanin e Elezit, Skenderajn. Aleanca për Ardhmërinë e Kosovës dy komuna Deçan dhe Suharekë. Lidhja Demokratike e Kosovës dy komuna Lipjan dhe Pejë. Fituesja e këtij raundi të zgjedhjeve është Lista Serbe, e cila fitoi nëntë komuna nga 10 sa garonte.
Surpriza e rezultatit të deritanishëm është lëvizja “Vetëvendosje” e kryeministrit Albin Kurti, e cila nuk ka marrë asnjë komunë në raundin e parë.
Sipas KQZ, në Prishtinë kandidati më i votuar është Arben Vitia me 35 mijë e 243 vota. Pas tij, renditet kandidati i Lidhjes Demokratike të Kosovës, Përparim Rama, i cili mori 24 mijë e 474 vota, apo 29,34 %. I treti renditet kandidati i Partisë Demokratike të Kosovës, Uran Ismaili. Ai ka arritur të sigurojë 18 mijë e 23 vota (21,61%).
Në Prizren udhëheq Mytaher Haskuka i Vetëvendosjes me 22 mijë e 144 vota, më pas Shaqir Totaj me 17 mijë e 508 e i fundit me 8 mijë e 505 vota renditet kandidati i Lidhjes Demokratike të Kosovës, Anton Quni.
Në Gjakovë, më i votuari është Alban Hyseni i Lëvizjes Vetëvendosja me 17 mijë e 693 vota, i ndjekur nga kandidati Lutfi Haziri me 17 mijë e 517 e më pas Leonora Morina Bunjaku me 3 mijë e 227.
Agim Aliu i Partisë Demokratike të Kosovës, rezulton më i votuari në Ferizaj me 30 mijë e 75 vota. Pas tij vijnë Valon Ramadani i Vetëvendosjes me 12 mijë e 450 vota dhe Sibel Halimi me 4 mijë e 493.
