Situata tek skuadra e Partizanit është tejet e rënduar. Kryeqytetasit ende nuk e kanë arritur fitoren e parë këtë sezon. Të hënën e ardhshme luhet derbi i kryeqytetit dhe nëse të kuqtë humbasin ndaj Tiranës shkarkimi i trajnerit Ilir Daja mund të jetë thuajse i sigurtë. Një prej trajnerëve që flitet për të marrë drejtimin e Partizanit është Shpëtim Duro i cili e ka drejtuar më herët këtë skuadër. Në lidhje me këtë çështjë është prononcuar vetë trajneri duke theksuar:
“Nuk është e çuditshme se ndërrimi i trajnerëve vazhdon, edhe në Serinë A kanë ikur tre. Çdo trajner qëndron në punë në bazë të rezultateve, ka edhe te ne si unë që mund të largohen për arsye nga më të ndryshmet. Partizani me derbin me Tiranën është një moment që ose të kthehet qetësia, ose patjetër do të ketë probleme nëse humb. Humbja mund të ketë ndikim edhe te Tirana, por jo si do të ishte te Partizani.
Aty trajneri është në aktivitet por profesioni im është të kem punë, unë nuk do të rri pa punë, ky është profesioni. Aq më shumë që Partizani është familja ime. Por të gjitha janë në kuadrin e supozimeve. Unë sinqerisht them që Partizani duhet të përmirësohet dhe jam i bindur që me kualitetin që ka edhe në derbi mund të marrë rezultat pozitiv e qetësohet situate”, theksoi Duro.
