Sot është dita e dytë e mësimit në auditore, ku nuk lejohet hyrja e studentëve të pa vaksinuar. Të rinjtë kanë kërkuar që të mos ketë diskriminim mes atyre që janë vaksinuar dhe ato të cilët nuk janë vaksinuar, pasi marrjen e dozës së vaksinës pa pëlqimin e tyre dhe me detyrim e konsiderojnë një krim ndaj njerëzimit. Dita e sotme paraqitet e qetë, por nuk dihet ende nëse do të shoqërohet me incidente dhe protesta.
Në Tiranë, studentët janë shprehur se një pjesë janë ndjerë të detyruar të vaksinohen për të mos humbur vitin akademik.
Në çdo universitet në Tiranë, janë vendosur efektivët e policisë. Situatë problematike është paraqitur ditën e djeshme edhe në qarqet e tjera.
Në Gjirokastër, Elbasan, Durrës dhe Shkodër nuk ka pasur incidente, por shumë student kanë mbetur jashtë auditorit. Ditën e djeshme, studentët kanë paralajmëruar padi kolektive kundër urdhrit të Ministrisë së Shëndetësisë që i detyron të vaksinohen.
Nëse nuk do të lejohet të hyjnë në mësim, ata kanë paralajmëruar edhe protesta masive, deri në plotësimin e kushteve të tyre. Hera-herës përveç studentëve, pedagogët kanë bërë thirrje që testi PCR të jetë falas për çdo studentë të pavaksinuar dhe të ofrohet në hyrje të universitetit.
