Zbardhet identiteti i “të shkurtit”, një nga tre grabitësit që hynë për të vjedhur dhe vranë 20-vjeçaren Caroline Crouch. Sipas medias greke “Espresso”, bëhet fjalë për një kriminel i njohur shqiptar, i cili është i dënuar më parë për vrasje në tentativë, formimin e një organizate kriminale, grabitje dhe një mori krimesh të tjera dhe së fundmi ka dalë nga burgu.
Sipas të njëjtave burime, Policia ka shkuar menjëherë ta kërkojë në adresën ku shqiptari deklaron se banon, por nuk e ka gjetur. Identiteti i tij u zbulua nga 32-vjeçari Harallambos Anagnostopoulos, bashkëshorti i të ndjerës.
Në rrëfimin e tij në Polici, piloti bëri me dije se kishte pikasur një njeri të shkurtër, rreth 1.70 m, pak të mbushur dhe me ngjyrë të errët lëkure. Ndërkohë që deri më tani lidhur me ngjarjen që tronditi Greqinë është arrestuar një 36-vjeçar nga Gjeorgjia. Ky i fundit mendohet se është pjesë e një bande gjeorgjane dhe dyshohet se kishte rolin e informatorit.
Ngjarja e rëndë ka ndodhur në Greqi pak ditë më parë. Tre persona, të cilët shkuan për të grabitur një shtëpi në Greqi, përfunduan duke vrarë një 20-vjeçare britanike, qenin e familjes dhe duke torturuar bashkëshortin e të resë.
