Nënkryetari i PD-së, Enkeled Alibeaj, ka treguar ditën e sotme se kryeministri Edi Rama e ka detyrim moral që të paraqitet për dëshmi në Komisionin Hetimor të “25 prillit”. I pyetur se si do të veprojë Komisioni nëse Rama nuk shkon, Alibeaj tha se do detyrohet ta marrin me forcë. “Besoj që një shtetar e ka një detyrim moral. Besoj që e ka për detyrim etik, moral, që nevojës, kërkesës, fakteve që ka shkelur ligjin, të vijë dhe të përballet me të. Thirrja për tu dëshmuar që nëse nuk e zbaton dëshmitari, është detyrim i organeve të policisë për ta sjellë”, u shpreh ai.
Ndërsa foli për amendamentet e tjera të PD, që kërkojnë ndryshim të reformës zgjedhore dhe territoriale, Alibeaj tha se çdo hap do hidhet në bazë të rekomandimeve të OSBE.
“Për ndryshime të Reformës Zgjedhore do të duhet të bëhen me komisione të përbashkëta dhe jo vetëm partiake, por duke thirrur ekspertë, duke marrë për bazë rekomandime të ODIHR-it”, tha Alibeaj.
Në listën e publikuar nga Komisioni evidentohet se do thirren për të dëshmuar disa ministra, kryetarë bashkish si dhe kreu i SPAK, Arben Kraja.
