Një operacion anti-drogë është duke u zhvilluar me urdhër të Prokurorisë së Posaçme Kundër Korrupsionit dhe Krimit të Organizuar në Lezhë. Policia nuk ka dalë ende me një njoftim për shtyp , por burime për gijotina.com bëjnë me dije se deri më tani janë arrestuar 12 persona të cilët akuzohen për vepra të ndryshme penale.
Gjithashtu gijotina.com ka mësuar emrat e disa prej të arrestuarve deri më tani. Konkretisht në pranga kanë rënë Tanush Lekgegaj dhe Pashk Lala të cilët akuzohen për prodhim dhe shpërndarje të lëndëve narkotike.
Ndërkohë Gjin Kola, Leonard Kola dhe Ilir Prenga të cilët janë arrestuar akuzohen për grup të strukturuar kriminal në fushën e lëndëve narkotike.
Sakaq, nuk dihet ende nëse gjatë kontrolleve që janë ushtruar janë gjetur armë, municione apo lëndë narkotike.
Theksojmë se ky është operacioni i parë që zhvillohet në Lezhë pas vrasjes së nënkomisarit Saimir Hoxha, ngjarje e ndodhur në fund të muajit shtator, nga 21 – vjeçari Aldi Rama. Ky i fundit vrau dhe veten më pas.
