Rreth 30 fëmijë të lagjes “Kroi i kuq” në Kukës, prej dy ditësh nuk janë dërguar në shkollë. Prindërit të shqetësuar denoncojnë se ata duhet të kalojnë çdo ditë aksin e rrugës Kukës- Bicaj, që më pas të arrijnë në godinat e shkollave të qytetit ku ata mësojnë. Kjo sipas prindërve përbën një rrezik shumë të madh për jetën e tyre sepse rruga nuk ka standardet e sigurisë rrugore dhe mungojnë trotuaret, ndërkohë që kërkojnë të sigurohet transport për t’i çuar fëmijët në shkollë.
“Komplet rruga, ska trotuare. Si gjithë bota edhe në kërkojmë që të bëhen trotuaret, e të paktën të ketë një fugon, për t’i çuar fëmijët në shkollë. Përndryshe do i lëmë fëmijët në shtëpi, nuk i çojmë sot në shkollë është e rrezikshme”, është shprehur një nga prindërit.
Edhe vetë fëmijët u shprehën se kanë frikë të kalojnë rrugën të vetëm të cilën më të vështirë do ta kenë gjatë stinës së dimrit.
Këtë të marte prindërit kanë paralajmëruar mos dërgim të fëmijëve në shkollë deri në zgjidhjen e kësaj problematike. Kjo lagje përbëhet nga 300 banorë dhe si rrugë të vetme për tu lidhë me qytetin përdorin këtë rrugë.
