Covid-19 ishte dhe një mundësi mirë për laboratorët privatë, pasi rezultuan përfituesit më të mëdhenj financiarë të pandemisë. Kërkesa e shtuar për tamponë, në mungesë të përgjigjes nga shteti, u siguroi atyre fitime deri në 12 herë më të larta se vitet e kaluara.
Shumë prej laboratorëve mjekësorë privatë që u licensuan edhe nga qeveria, siguruan vitin e kaluar të ardhura dhe fitime që nuk i kishin realizuar ndonjëherë. Nevoja për të kryer teste Covid-19, krijoi radhë të gjata në qendra laboratorike dhe në kufi, ku privatët administronin tamponët, fillimisht me çmim mbi 90 euro.
Genius Lab, ndër të parët që nisi shërbimin e testeve Covid, fitoi 1.9 milion euro nga 147 mijë që deklaronte në 2019. Edhe Intermedica i 4-fishoi fitimet, duke përfituar 2.2 milion euro në vitin e pandemisë.
Ministria e Shëndetësisë ka licencuar prej korrikut, 12 laboratorë privatë, të cilët supozohej se do të testonin qytetarët për dokument udhëtimi. Edhe pse në ditët e para testet ishin me çmime shumë të larta, ku një test shkonte deri në 12 mijë lekë të reja.
Ndërkohë për këtë nuk ndërhynte as Autoriteti i Konkurrencës, për të ulur çmimin. Pas disa ankesave të qytetarëve, në nëntor të 2020-ës, laboratorët privat vendosën të ulin çmimin në 8500 lekë të reja.
Kujtojmë se Kontrolli i Lartë i Shtetit në raportin e publikuar në 15 tetor të këtij viti, theksonte se mbulimi financiar në rastin e COVID-19 nga sigurimet nuk ishte i plotë dhe nuk garantoi ndonjë ndikim të ndjeshëm në uljen e shpenzimeve nga xhepi për shëndetësinë. Shpenzimet nga xhepi për shëndetësinë ishin të larta si për personat e siguruar, ashtu dhe për personat e pasiguruar.
