Të tjera detaje janë zbuluar nga dosja hetimore në lidhje me 3 urdhër arrestet e lëshuara nga Prokuroria e Tiranës ndaj efektivëve të policisë së kryeqytetit. Mbi ta rëndon akuza e shpërdorimit të detyrës, por çfarë ka ndodhur?
Tre policët janë kapur në shkelje e ka qenë Durim Murja ai i cili u ka kërkuar kolegëve të shkelin detyrën, për të mos raportuar një dasmë e cila vijonte me muzikë të lartë jashtë orarit të lejuar. Murja ishte pikërisht vetë pjesë e festës, për të cilën qytetarët kishin telefonuar sallën operative pasi muzika ishte shqetësuese. Bëhet fjalë për datën 14 gusht rreth orës 00:40, ku në lagjen “Shkozë” dëgjohej muzikë e lartë.
Efektivi Arjan Balla shkoi për të konstatuar telefonatën e bërë, e cila ishte e vërtetë, por për shkak të miqësisë me kolegun u detyrua të raportonte se njoftimi ishte i rremë. Durim Murja i ka kërkuar kolegut Balla që të mos e ndërpresë dasmën ku vetë ishte i ftuar. Qytetarët u ankuan sërish në komisariat, por efektivi raportoi se alarmi qe fals.
Për shkak të këtyre shkeljeve, prokuroria lëshoi urdhër arreste për Durim Murjan, Jashar Shehun dhe Arjan Ballën, ndërsa Matilda Hamolli ndodhet në arrest shtëpie.
