Cirku Kombëtar që ndodhej në afërsi të qendrës së Tiranës është shembur sot nga autoritetet, pasi trualli ku ishte ngritur çadra do i rikthehet pronarit.
Kujtojmë se, në muajin korrik, Zyra e Përmbarimit, kërkoi uljen e çadrës dhe lirimin e truallit ndaj pronarit, si dhe vendosi bllokimin e buxhetit të cirkut.
Vendimi që Cirku Kombëtar të lirojë truallin është marrë nga gjykata pa qenë prezente përfaqësia e tyre.
Më herët aktivistë të shoqërisë civile dhe artistë u ngritën në protestë. Ata pretenduan se pala mbrojtëse, në këtë rast Ministria e Kulturës nuk ka pasur informacion për mbajtjen e seancës gjyqësore mbi pronësinë e truallit ku ndodhet çadra e Cirkut.
Për këtë vendim artistët nisën edhe një shkresë zyrtare në Kryeministri dhe Presidencë, e cila mesa duket nuk u mor parasysh pasi sot ka nisur puna për shembjen e cirkut kombëtar.
