Gjatë një vizite në ambientet e Institutit të Sigurisë Ushqimore dhe Veterinare, ministrja, Frida Krifca, bëri me dije se tashmë me akreditimi e këtij institucioni do të rriten kontrollet dhe analizat. Sipas saj, 96 teste për kryerjen e analizave që nga bimët e deri te ato me orgjinë shtazore, janë një element më shumë garancie për sigurinë ushqimore në vend.
Krifca shtoi se, këto analiza që më parë kryheshin jashtë vendit kërkonin më shumë kohë dhe kostot, ndërsa tanimë përpos eliminimit të këtyre shpenzimeve me akreditimin bëhet e mundur reagimi më i shpejt dhe më fleksibël ndaj rezultateve. Pëllumb Aleksi, përgjegjës i Departamentit të Cilësisë tha se këto teste janë të njohura në Evropë dhe më gjerë.
Shpresojmë, që këtë herë akreditim mos të jetë thjesht fasadë që përdor qeveria për propagandë dhe mburrje. Pasi, nga ana tjetër Kontrolli i Lartë i Shtetit, evidenton se laboratori ende nuk është i akredituar për kryerjen e analizave të produkteve me origjinë shtazore dhe joshtazore. Sipas KLSH, gjendja e pajisjeve laboratorike nuk është në nivelin e mjaftueshëm, për të siguruar funksionim të plotë laboratorit, dhe për pasojë një pjesë e mirë e treguesve nuk analizohen.
KLSH tregon se, ky institucion nuk është plotësisht në funksion, pasi një pjesë e mirë e laboratorëve nuk shërbejnë më për analiza dhe kontrolle. “Nga 65 pajisje që administron laboratori, 27 prej tyre janë pajisje që kanë nevojë për kalibrim. Nga 65 pajisje që administron laboratori, 11 prej tyre janë jashtë funksionit, nga të cilat sipas vlerësimit të bërë nga tekniku përkatës, 4 prej tyre nuk mund të riparohen”, thekson KLSH.
Gjithsesi, mbetet për t’u parë nëse do të shtohet numri i analizave dhe nëse do përmirësohet cilësia e produkteve në vend, pasi deri më tani çdo gjë ka dështime, kontrollet kanë qenë shumë të pakta ose shpesh herë kanë qenë kontrolle jo të plota, por sa për të kaluar radhën dhe për të thënë që instituti punon.
