Skuadra e Romës pësoi një humbje të thellë 6-1 ndaj norvegjezëve të Bodo/Glimt, disfata më e thëllë në karrierën e Jose Murinjo. Ky fakt nuk është pritur aspak me qetësi nga trajneri luzitan që ka shpërthyer pas ndeshjes duke paralajmëruar se lojtarët që u aktuvizuan në këtë ndeshje nuk do të kenë më hapësira.
“Përgjegjësia është e imja, jam unë që vendosa të luaj me këtë skuadër. E bëra me dëshirën e mirë që t’i jepja mundësinë të luanin futbollistëve që punonin shumë e nuk luanin shumë. Me ekipin që kemi, me gjithë ndeshjet që duhet të luajmë, desha të pushonin lojtarët që luajnë gjithmonë. Kemi humbur kundër një skuadre që ka më shumë cilësi se ne. Sa i përket formacioneve titullare, ata kishin më shumë cilësi se ne.
Nëse do të mund të luhej gjithmonë me të njëjtit lojtarë, do ta bëja, por është rrezik i madh pasi kemi një diferencë të ndjeshme mes një grupi lojtarësh dhe një tjetri. Unë i dija kufizimet e lojtarëve të mi, nuk është asgjë e re, por qartësisht prisja një përgjigje më të mirë. Por përgjegjësia mbetet e imja.
Kam folur me lojtarët në dhomat e zhveshjeve, kam qenë i sinqertë me ta. Nuk e kam fshehur asnjëherë, e dija që kisha skuadër me shumë limite. Një gjë është të kesh një skuadër me 12-13 lojtarë dhe një gjë tjetër janë të tjerët. Tani askush nuk do të më pyesë më pse luajnë gjithmonë të njëjtët”, tha Murinjo. Një lajm aspak i mirë për Kumbullën që ka “djegur” mundësitë që trajneri Murinjo i ka dhënë në ndeshjet e Konferencë Ligë.
