Skënderbeu kërkon fitoren e parë këtë sezon të kategorisë superiore teksa kanë përballë një skuadër të fortë siç është Dinamo. Megjithatë klima tek kryeqytetasit nuk është e mirë pas humbjes së thellë 6-3 ndaj Vllaznisë. Portieri i ekipit korçar, Bekim Rexhepi ka paralajmëruar se kapiteni i Dinamos, Ibraimi nuk i shënon dot gol.
“Dihet që ndeshjet në këtë sezon janë të vështira dhe të gjitha duan impenjim maksimal. E tillë është edhe ndeshja me Dinamon. Ne kemi një informacion më shumë për këtë kundërshtar, pasi jemi përballur me ta edhe në ndeshjet e zhvilluara gjatë fazës përgatitore. Është një ekip i ri me elementë të mirë në përbërje. Por, besoj se kjo do të jetë ndeshja e kthesës për ne. Jemi të bindur dhe të vendosur që të marrim fitoren e parë sezonale, ndaj edhe do të japim maksimumin në këtë takim.
Një fitore na ngjit në renditje, pasi diferencat nuk janë të mëdha. Për këtë unë mendoj se do t’ia dalim. Ibraimi është një nga lojtarët më cilësorë që janë në Shqipëri për rolin e vet. Është i paparashikueshëm dhe mund të zgjidhë i vetëm një ndeshje. Por këtë herë duhet të marrë masat mirë, pasi nuk do të më shënojë dot. Ky është edhe basti im me të”, përfundoi portieri i skuadrës së Skënderbeut, Bekim Rexhepi.
