Pandemia ka krijuar një krizë të thellë ekonomike në vendin tonë, duke bërë që borxhi publik të kap vlera alarmante. Në raportin e publikuar nga Ministria e Financave tregohet se, borxhi publik ka arritur vlerën rekord prej 1.28 trilionë lekësh, afërisht 12.8 miliardë dollarë deri në tetor të këtij viti. Krahasuar me të njëjtën periudhë të në viti më parë, borxhi publik është rritur me 1 miliardë lekë, pasi në 2020 regjistronte vlera e 12.2 miliardë lekësh.
Ashtu sikur kishin paralajmëruar edhe organizatat e huaja si FMN apo Banka Botërore borxhi publik në vendin tonë kaloi kufirin maksimal në raport me Prodhimin e Brendshëm Bruto. Konkretisht, për vitin 2021 stoku i borxhit publik regjistrohet në nivelin 76.18% të PBB. Edhe pse ka pësuar një ulje të lehtë në krahasim me 2020 ku stoku kapte 77.85% të PBB, situata mbetet alarmante.
Të dhënat e raportuara evidentojnë se pjesa më e madhe e borxhit është krijuar nga qeveria qendrore, duke shkuar në 12.34 miliardë lekë në tetor të këtij viti. Ndërsa pesha që mban qeveria lokale regjistrohet 475 milionë lekë. Ndër të tjera, bëhet me dije se 41.4% e borxhit në raport me Produktin e Brendshëm Bruto është marrë në tregun vendas, ndërkohë që pjesa tjetër prej 34.7% është huazuar jashtë kufijve.
Por, më e keqja akoma nuk ka mbaruar sepse, ashtu sikur paralajmëroi qeveria me marrjen e eurobondit të ri do të kemi sërish rritje të borxhit publik. Kujtojmë se, përmes këtij do të kërkohet një shifër e konsiderueshme borxhi me vlerë deri 700 milionë euro. Sigurisht që këto hapa rëndojnë buxhetin e shtetit dhe ndikojnë në taksat e qytetarëve. Vetëm disa ditë më parë Fondi Monetar Ndërkombëtar i bëri thirrje qeverisë shqiptare që të ketë kujdes me shpenzimet pa kriter dhe të fillojë të punojë për uljen e borxhit.
