Pandemia përveç se nga ekonomia dhe shëndeti fizik, ka dëmtuar të prekurit edhe nga shëndeti mendor. Në lidhje me këtë ka folur sot psikologia Valbona Treska, e cila ka deklaruar se për në një javë trajton mbi 15 fëmijë të grupmoshave të ndryshme. Thotë se numri është në rritje dhe problematikat janë të ndryshme që kërkojnë trajtim të specializuar, sidomos që nga koha e pandemisë.
Shokues ishte fakti që ajo tregoi se, në kohët e fundit është shtuar numri i pacientëve që janë të abuzuar seksualisht dhe më keq akoma ka pasur raste të abuzimeve seksuale edhe tek fëmijët 3 vjeçar.
Ajo ngre shqetësimin se në vendin tonë organet kompetente nuk i vlerësojnë denoncimet për abuzimet seksuale. Tërmeti dhe pandemia kanë qenë dy faktorë të tjerë që kanë ndikuar negativisht te fëmijët. Shumë prej tyre kanë përjetuar situata traumatike, që i reflektojnë në sjellje.
