Komisioni Qendror i Zgjedhjeve në Kosovë, planifikon sot të numërojë votat me kusht dhe ato të personave me aftësi të kufizuara. Lajmin e ka bërë të ditur zëdhënësi i KQZ-së, Valmir Elezi.
“Gjatë ditës së sotme planifikojmë të bëhet numërimi i votave me kusht dhe atyre të personave me nevoja të veçanta. Mediat dhe vëzhguesit do të njoftohen paraprakisht për orën e fillimit të numërimit”, ka deklaruar Elezi.
Ndryshe, në Qendrën e Numërimit dhe Rezultateve, ditën e djeshme ka përfunduar numërimi i votave me postë.
Nga totali i votave të ardhura nga diaspora, Lidhja Demokratike e Kosovës që udhëhiqet nga Lumir Abdixhiku ka arritur që të marrë më shumë vota se Lëvizja Vetëvendosje e Albin Kurtit, se PDK-ja e Memli Krasniqit dhe se AAK-ja e Ramush Haradinajt.
Nga totali i votave të diasporës, LDK-ja ka marrë gjithsej 3 mijë e 158 vota, Lëvizja Vetëvendosje ka marrë vetëm 2 mijë e 692, AAK-ja e Haradinajt rreth 1 mijë e 500, ndërsa PDK-ja ka marrë pak më shumë se 1 mijë vota.
Gara më e ngushtë me votat e diasporës ka qenë mes Lidhjes Demokratike të Kosovës dhe Lëvizjes Vetëvendosje.
Diferencë e madhe në mes të LDK-së dhe VV-së në votat që kanë marrë nga diaspora vërehet në Komunën e Suharekës. Atje kandidati i LDK-së ka marrë gjithsejtë 711 vota, kandidati i AAK-së i dyti me 307 vota, derisa kandidati i VV në vendin e tretë me vetëm 147 vota.
Edhe në Komunën e Dragashit diferenca ka qenë shumë e madhe. Behxhet Xheladini i LDK-së ka arritur të marr 359 vota nga diaspora, ndërsa kandidatja e VV, Kaltrina Salihu ka marrë vetëm 76 vota. PDK ka marrë vetëm 77 vota.
