Listës së vendeve që qytetarët shqiptarë e kanë të ndaluar të hyjnë si pasojë e masave të rrepta anti- Covid, së fundmi i është shtuar dhe Italia.
Ndonëse numri i infektimeve në vend është ulur si pasojë e vaksinimit, qeveria italiane ka vendosur të zgjasë kufizimet për personat që duan të hyjnë në vend. Mediat fqinje shkruajnë se sipas urdhrit të fundit të Ministrisë së Shëndetësisë turistët nga shumica e vendeve europiane, nuk do të mund të hyjnë në Itali, të paktën deri më 15 dhjetor të këtij viti.
Mësohet se, Shqipëria është gjithashtu në listën e vendeve me të cilët Italia ka mbyllur edhe një herë kufijtë. Me vendimin që pritet të hyjë në fuqi nga nesër, mësohet se udhëtimi nga vendi ynë drejt Italisë dhe e personave që kanë udhëtuar gjatë 14 ditëve të fundit në Shqipëri do të bëhet vetëm për motive pune, shëndeti, studimi, urgjencë absolute apo rikthim në banesën e rezidencës.
Përjashtim është bërë vetëm për qytetarët e Izraelit, të cilët mund të udhëtojnë drejt Italisë nëse paraqesin Green Pass-in ose tamponin negativ për Covid.
