Deputeti i Partisë Demokratike, Ervin Salianji ka njoftuar se Kuvendi Kombëtar nuk mund të mblidhet.
Sipas tij, kërkesa e ish-kryeministrit Sali Berisha nuk mund të plotësohet, pasi statuti i partisë nuk e shqyrton.
“Pavarësisht numrit të firmave nuk mund të mblidhet Kuvendi Kombëtar, për një kërkesë që statuti i partisë nuk e shqyrton. Nuk mblidhet. Kuvendi Kombëtar i Partisë Demokratike nuk mund të mblidhet pa një kërkesë statutore”- pohoi Salianji.
Ish-kryeministri Sali Berisha njoftoi nga foltorja e Beratit se këtë javë do të njoftohet mbledhja e Kuvendit Kombëtar.
Berisha tha se statuti i PD e parashikon qartë që Kuvendi mblidhet edhe me kërkesë të 1/4 së delegatëve.
“Javën që vjen do të shpallim datën për mbledhjen e Kuvendit Kombëtar. Do të mblidhemi sipas të drejtës statutore për t’i dhënë PD-së normat më të mira statutore që ajo meriton. Për të përcaktuar ju me referendum jo vetëm kryetarin, por edhe kryeministrin. Do vijë njëherë tek ju, që të jetë apo jo kryeministër”, shprehej Berisha në Berat. Me këtë reagim të bërë mbrëmjen e sotme, Salianji i ka “mbyllur derën” Kuvendit Kombëtar.
Për sa i përket kërkesës së Berishës, demokratët janë ndarë në dy grupe, ata që mbështesin idenë për Kuvendin dhe ata të cilët e kundërshtojnë.
