Në një intervistë për mediat, ish-Sekretari i Përgjithshëm i Partisë Demokratike, Arben Ristani ka sqaruar dy mënyrat se si mund të arrihet mbledhja e Kuvendit Kombëtar të Partisë Demokratike. Ristani tha se ekziston thirrja nga Këshilli Kombëtar i PD-së, por edhe vetëmbledhja.
Sipas tij, nëse një e katërta e demokratëve firmos, Kuvendi mblidhet dhe madje ka kompetenca për të shkrirë partinë.
“Kuvendi ka dy mënyra për t’u mbledhura. Një mënyrë është ajo e procedurës kur e thërret Këshilli Kombëtar, mënyra tjetër është vetëmbledhja. Kjo bëhet kur e kërkon një e katërta e përbërjes së Kuvendit.
Kur kjo një e katërta e kërkon dhe mblidhet nuk ka asnjë gjë që e kundërshton. Kështu, nëse mblidhet ka kompetencë të bëjë dhe të marrë çdo vendim që e konsideron të arsyeshëm. Nuk ka asnjë teknikalitet që e kundërshton. Kuvendi ka kompetenca edhe për shkrirjen e Partisë”- tha Ristani.
Ristani gjithashtu ka thënë se ‘Foltorja’ ka ndezur motorët jo vetëm të ringritjes së saj por për të qenë një alternativë në zgjedhjet e ardhshme.
