Nga dita e sotme hynë në fuqi masat e reja të udhëtimit drejt Italisë. Ministria për Evropën dhe Punët e Jashtme njoftoi se qeveria italiane ka forcuar masat kufizuese, për të përballuar situatën emergjente epidemiologjike shkaktuar nga Covid-19 duke lejuar që të udhëtojnë përtej Adriatikut vetëm disa kategori me specifika të veçanta.
Ndonëse numri i infektimeve në vend është ulur si pasojë e vaksinimit, qeveria italiane ka vendosur të zgjasë kufizimet për personat që duan të hyjnë në vend. Mediat fqinje shkruajnë se sipas urdhrit të fundit të Ministrisë së Shëndetësisë turistët nga shumica e vendeve europiane, nuk do të mund të hyjnë në Itali, të paktën deri më 15 dhjetor të këtij viti.
Kështu, nga sot nga Shqipëria në Itali mund të udhëtojnë individë për motive të caktuara si: pune, shëndeti, studimi, urgjence, persona të cilët kthehen në vendin e tyre të rezidencës, familjarët e ngushtë të shtetasve shqiptarë të pajisur me leje qëndrimi të rregullt në Itali, personat të cilët kanë një marrëdhënie emocionale të provuar dhe të qëndrueshme me shtetas që janë rezident në Itali, sportist, teknik dhe gjykatës garash dhe shoqërues që marrin pjesë në aktivitete sportive olimpike, paraolimpike të certifikuara dhe me interes kombëtar.
Gjithashtu personat që udhëtojnë nga Shqipëria drejt Italisë, pavarësisht nga nënshtetësia dhe që kanë qëndruar aty më shumë se 120 orë do t’i nënshtrohen edhe një vetë izolimi 10 ditor, në fund të të cilit do kryejnë edhe një tampon molekular apo antigjenik.
Nga gushti deri në ditën e djeshme çdokush mund të udhëtonte drejt Italisë vetëm duke treguar certifikatën e vaksinimit ose një test PCR. Por me vendimin e sotëm, asnjë shqiptar nuk do të mund të futet në Itali nga Shqipëria pa pasur një arsye specifike. Përjashtim është bërë vetëm për qytetarët e Izraelit, të cilët mund të udhëtojnë drejt Italisë nëse paraqesin Green Pass-in ose tamponin negativ për Covid.
