Ish zv.kryeministri Erion Braçe që pas lënies së postit ka shfaqur pakënaqësi në lidhje me qeverinë, gjë të cilën e vijoi dhe gjatë diskutimeve në Komisionin e Ekonomisë. Braçe nuk u kursye kur foli për nënpunësit e korruptuar, sipas të cilit janë ata shkaku i mosfunksionimit të institucioneve që përfaqësojnë.
Gjatë diskutimit Braçe zbuloi se shumë herë gjatë kohës që ai ishte zëvendëskryeministër, kur shkonin për marrjen e përgjigjeve në ministri për çështje të caktuara, ministrat nuk gjendeshin në vendin e punës.
Teksa iu kërkoi me tone kritike që të hapin krahun të gjithë ata nënpunës të përfshirë në korrupsion, Braçe theksoi se krijimi i agjencive për të bërë të mundur funksionimin e institucioneve është shpenzim i shkuar dëm, pasi sipas tij janë vet strukturat e ministrisë që nuk e fillojnë ditën duke patur në mendje t’i shërbejnë qytetarëve.
Braçe gjatë fjalës së tij u shpreh se kjo situatë vijon prej shumë vitesh dhe paratë po hidhen kot, ndërkohë që puna e duhur është bërja e institucioneve të veprojnë ose në të kundërt të dorëzojnë detyrën.
“Nuk ka mjaftuar ajo agjensi që ishte atje. E dini sepse nuk ka mjaftuar. Sepse fillon këtu. Nëse ministri, zëvendësministri, struktura e ministrisë dhe agjencitë nuk e fillojnë ditën e punës duke patur në mendje t’i shërbejnë qytetarit, nuk ndodh kjo. Aty është zonja. Tani se nuk nxjerr dhe ndonjë sekret të madh, sa herë kemi vajtur ne në ministri dhe nuk kemi gjetur ministrat në punë. Kemi shkuar për të kontrolluar marrjen e përgjigjes institucion me institucion dhe vendosën tabela për të kontrolluar fliksin e ankesave dhe përgjigjet që jepeshin.
Nëse ka agjenci që nuk i përgjigjen qytetarit për një mijë e një arsye dhe ku një prej arsyeve është korrupsioni, në hipoteka, në tatime në inspektime, duhet hapur krahu, sipas ish zv.kryeministrit.
Ligji për nënpunësin civil e ka të përcaktuar qartë, por mungon vullneti për të larguar atë që nuk i shërben qytetarëve dhe e bën institucionin të dështojë”, tha Braçe.
