Pas ndërprerjes së mbledhjes së Komisionit Hetimor për zgjedhjet e 25 prillit dhe largimit të mazhorancës nga takimi, opozita vijoi komunikimin live nëpërmjet ‘Facebook’.
Deputeti demokrat, Ervin Salianji ka thënë se komunikimi po zhvillohej në kushtet e një terri politik pasi PS ka frikë nga hetimi i zgjedhjeve.
“Në pamundësi për të pasur komunikim tjetër për shkak të fshehjes së përfaqësuesve socialistë nga frika që kanë për hetimin e zgjedhjeve dhe të publikimit të elementëve të masakrës zgjedhore, jemi të detyruar të vijojmë punën në situatën e një tentative për terr informativ. Meqë Komisioni po vijon me punën kam disa propozime për administrimin e kërkesave dhe marrjen e të dhënave. Në zgjedhjet e 25 prillit PD nuk kishte përballë një parti, por partinë shtet. Punësimet elektorale në administratën publike bazuar në të dhënat e drejtorisë së Përgjithshme të Tatimeve në vitin 2020 kane qenë punësuar 182 mijë persona krahasuar me 85 mijë të punësuar në vitin 2014. Nga të dhënat e ministrisë së Financave nga buxheti i shtetit në vitin 2013 janë shpenzuar 375 milionë euro për paga bazë, vlerë e cila është kufizuar në 620 milionë euro në vitin 2020”, tha Salianji.
Gjatë këtij komunikimi, deputeti Oerd Bylykbashi deklaroi se zgjedhjet e 25 prillit nuk ka qenë të lira dhe të ndershme, pasi sipas tij shteti është shkrirë me partitë.
“Theksoj se evidentohet qartë prishja e ndarjes së qartë midis shtetit dhe partisë në pushtet. Partitë nuk duhet të shkrihen me shtetin, por ka ndodhur e kundërta e asaj që kërkon OSBE. Më 25 prill shteti ka hyrë në lojë dhe kur shteti hyn në lojë nuk ka zgjedhje të lira dhe të ndershme”, tha ai.
I ndalur tek blerja e votës, Bylykbashi tha se ky ka qenë një fenomen masiv, ndërsa theksoi se epiqendra e shpërndarjes së parave ishte Bashkia Durrës. Ndërkohë kreu i Komisionit, Enkelejd Alibeaj tha se mbledhja e radhës do të mbahet në 29 tetor në orën 10:00.
