Uji i pijshëm në Krujë, që helmoi mbi 500 qytetarë, rezulton me ngarkesë bakteriale të esheria koli dhe streptokokut fekal.
Analizat paraprake të bëra në ujin e Krujës janë bërë të ditura.
Nga analizat që i janë bërë ujit në ISHP janë zbuluar në prani të lartë dy baktere, Escherichia Coli dhe Streptokokut Fekal.
Dyshohet se uji është ndotur në burim, ndërkohë që në afërsi të depos së ujësjellësit ndodhet edhe një stan me bagëti.
Esheria Koli është lloj bakteri që njihet për shkaktimin e irritimit në stomak. Simptomat përfshijnë diarrenë, dhimbjet në bark, vjelljen dhe marramendjet. Ky bakter mund të shkaktojë edhe probleme tjera, duke përfshirë cista, infeksione në trakt urinar dhe pneumoni. Streptokoku është një infeksion bakterial që shkakton inflamacion dhe dhimbje në fyt. Streptokoku mund të prekë fëmijët dhe të rriturit e të gjitha moshave. Sidoqoftë, është veçanërisht e zakonshme tek fëmijët në moshën 5 – 15 vjeç.
Që nga mëngjesi i së dielës, shumë qytetarë në Krujë u paraqitën në spital me simptoma helmimi si dhimbje koke, dhimbje barku, diarre e të vjella. Furnizimi i qytetit me ujë është ndërprerë që prej mesditës së të hënës.
Në lidhje me këtë ngjarje, Prokuroria e Krujës njoftoi më herët sot nisjen e hetimeve, teksa është urdhëruar kryerja e akteve të ekspertimit mjeko – ligjor. Ndotja ujërave përbën vepër penale, për të cilën Kodi Penal parashikon deri në 10 vjet kur kjo vepër, ka shkaktuar pasoja të rënda për jetën e shëndetin e njerëzve.
Por Kruja nuk është qyteti i vetëm që furnizohet me ujë jashtë parametrave që garantojnë cilësinë e konsumit.
Në vitin 2017 në një padi asokohe, Gjykata Administrative e Shkallës së Parë Tiranë ka pranuar se cilësia e ujit që furnizohej kryeqyteti në vitet 2016-2017 (kohë kur u ngrit padia) ishte jashtë parametrave që garantojnë cilësinë e konsumimit.
“Ka rezultuar se analizat mikrobiologjikë apo kimikë që garantojnë cilësisë së ujit të pijshëm. janë bërë nga një laborator i pa akredituar, duke mos dhënë asnjë garanci për asnjë parametër” – thuhej gjithashtu në padi.
