Kritikat e kryeministrit Edi Rama për gjendjen e ujësjellësve në vend pas dy mandateve në pushtet, ka sjellë reagimin e Partisë Demokratike.
Deputeti i Shkodrës, Helidon Bushati shkruan në Facebook se Rama po reagon për gjendjen e rëndë në këtë sektor pas 8 vitesh, teksa shton se askush nuk mban përgjegjësi për situatën e krijuar.
“Pas 8 viteve në pushtet, Rama ka mësuar se gjendja e Ujësjellësve është e rëndë. Më parë deklaronte se ka bërë më shumë se gjithë qeveritë të marra bashkë, por sot po i rezulton dështim. Ngjarja në Krujë ku u helmuan qindra banorë, nxori në pah punët elektorale, pa cilësi dhe të dëmshme të rilindjes. Prej 30 muajsh ai ka nën kontroll edhe çdo bashki tashmë, me kryetarë të emëruar prej tij. I kujt është faji? Kush mban përgjegjësi?”, shkruan deputeti demokrat.
Bushati akuzon kryeministrin se i ka promovuar vetë ish-drejtuesit e fundit të ujësjellësve, e madje se i ka dhënë edhe poste më të larta.
“Prej 30 muajsh ai ka nën kontroll edhe çdo bashki tashmë, me kryetarë të emëruar prej tij. I kujt është faji? Kush mban përgjegjësi? Ish-drejtuesit e fundit te Ujësjellësve ti i ke promovuar, i ke bërë deputetë e zyrtarë akoma më të lartë. E vërteta është se ky sistem është sot në këtë pikë, sepse i ngjan kryekëput dhe është pjellë e rilindjes, e qeverisjes për përfitime, për interesa, e për vota”, shprehet Bushati.
Një ditë më parë, kryeministri Edi Rama mblodhi në Kryeministri krerët e bashkive, ku i tërhoqi vërejtje mbi situatën e arkëtimeve nga ana e ujësjellësve në vend, nisur nga ngjarja e Krujës, ku rreth 500 qytetarët u helmuan për shkak të baktereve që u gjetën në ujë.
