Shoqata e biznesit të vogël ka paralajmëruar se do të mbajë një protestë sot në mesditë, duke ulur qepenat. Arsyeja është ligji I fiskalizimit. Edhe më herët ata kanë kërkuar që ky proces të shtyhet në kohë për dy arsye.
“Së pari ky proces ka kosto për anëtarët e shoqatës tone, pasi ne jemi biznes i vogël. Së dyti përdorimi I këtij procesi kërkon një teknologji dhe njohuri të lartë që ne nuk i kemi”, shprehet një prej tyre. Shoqata e Biznesit i kërkon qeverisë që të reflektojë për këtë kërkesë, pasi aktiviteti ekonomik pas krizës së pandemisë nuk mund të përballojë kostot shtesë.
Nuk mund që ne të zbatojmë një teknologji të tillë ku fuqia blerëse është e ulët ndërsa çmimet dhe kostot janë rritur për çdo gjë. Ne I kërkojmë qeverisë që të reflektojë. Nëse nuk ka reflektim, ne do të përshkallëzojmë protestat.
Aktualisht procesi i fiskalizimit është duke ecur me ritme të ngadalta në të gjithë vendin, kjo pasi deri në fund të vitit, nuk parashikohet të aplikohen penalitete në rast të gabimeve. Por nga një janari 2022 ligji thotë se faturat do të jenë tërësish elektronike.
