Policia e Durrësit ka arrestuar një person, pasi dyshohet se është autor 13 vjedhjeve në qytet gjatë dy muajve të fundit. Blutë bëjnë me dije se autori është banues në lagjen Nr.12, Durrës, i shpallur në kërkim prej kohësh për veprën penale “Vjedhja”. Ditën e sotme ai është kapur në flagrancë nga shërbimet e Policisë, duke vjedhur materiale ndërtimi në një pallat në proces rindërtimi. Pas verifikimeve paraprake ka rezultuar se ai është autor edhe i 13 vjedhjeve të tjera.
Policia bën me dije se, më datë 01.09.2021, në lagjen Nr.17, Durrës, dyshohet se ka vjedhur 2 pasqyrat e mjetit tip “Benz” në pronësi të shtetasit A. A. Ndërsa më datë 04.09.2021, në banesën e dëmtuar nga tërmeti, të shtetasit A. Xh., në lagjen Nr.12, Durrës, dyshohet se ka vjedhur instalimet e banesës.
Gjithashtu, personi në fjalë akuzohet edhe për vjedhjet e tjera kryesisht për para dhe bizhuteri. AI ka kryer edhe disa vjedhje në shtëpitë e dëmtuara nga tërmeti, ku ka hyrë dhe ka marrë sende me vlerë. Nuk kanë munguar edhe rastet ku ka vjedhur biçikleta, mjete ndërtimit dhe telefona.
Policia bën me dije se, i ka paraqitur të dhënat rreth tij dhe materialet e grumbulluara në Prokurorinë e Durrësit, për të vijuar me hetimet e mëtejshme.
