Tetori konsiderohet si muaji rozë për shkak të simbolikës së këtij muaji në luftën e grave me kancerin e gjirit.Fushatat sensibilizuese dhe thirrjet nga persona me influencë në shoqëri nuk kanë munguar gjatë tetorit rozë.
Sipas shifrave gjatë këtij muaji 9000 gra dhe vajza në të gjithë vendin kanë kryer mamografinë.Sipas ministrisë së shëndetësisë kjo është një shifër relativisht e lartë krahasuar me periudhën tjetër të vitit.
Muaji i sensibilizimit ndaj Kancerit të Gjirit, ndihmon në rritjen e vëmendjes dhe mbështetjes për vetëdijen, zbulimin dhe trajtimin e hershëm, si dhe kujdesin për këtë sëmundje.
Rast sensibilizimi i suksesshëm është ai i Nazife Ramadani dhe Angje Kola, dy gra nga qyteti i Pukës, të dyja të kuruara nga kanceri i gjirit.Ato tregojnë fazat e para të cilat i konsiderojnë si të dhimbshme, por që me mbështetjen e fëmijëve, shoqërisë dhe bluzave të bardha ia dolën të përballen me sëmundjen.
Fillimisht turpi ishte prezent në çdo moment duke sjell kështu komplekse që pas informimit u zhdukën, duke u kthyer në një model force dhe për gratë e tjera.
“Të them të drejtën në fillim kam pasur shumë turp. Punoja në një repart me 50-60 punëtore dhe e ndieja veten shumë të turpëruara. Por nga leximet që bëra, nga rrëfimet e atyre që e kishin përjetuar këtë sëmundje e kuptova që kjo jo vetëm që nuk është për të pasur turp, por është për të pasur forcë, për veten, për familjen, për shoqërinë që e mbajnë këtë sëmundje shumë të mbyllur, nuk arrijnë që të komunikojnë. Në ditët e mia më të vështira unë kam gjetur përkrahje forcë tek njerëzit që më pyesnin si je e më thoshin do bëhesh më mirë”, tregon Angje Kola.
Statistikat tregojnë se përhapja e kancerit të gjirit është 1 në 8 femra. Simptoma e parë e dukshme që shfaq kanceri i gjirit është një gungë që ndihet ndryshe nga pjesa tjetër e indeve të gjirit. Më shumë se 80% e rasteve me kancer gjiri janë zbuluar kur femra ndjen një gungë në gji. Kanceri i hershëm i gjirit zbulohen nga një mamografi.
Shumica e simptomave të çrregullimeve të gjoksit,duke përfshirë shumicën e gungave, nuk paraqesin domosdoshmërisht kancer gjiri. Megjithatë, shfaqja e një simptome të re duhet marrë seriozisht në konsideratë nga të dyja palët si pacientët ashtu edhe nga doktorët e tyre, për mundësinë e një kanceri gjiri, ku ky i fundit mund të shfaqet në pothuajse çdo moshë.
