Në mbledhjen e sotme të Komisionit të Financave, ministrja e Ekonomisë Delina Ibrahimaj, ka prezantuar projekt Buxhetin për vitin 2022. Ministrja përsëriti qëndrimin e saj, sipas të cilës do të ketë rritje ekonomike 4.1 në vitin 2022 dhe fiskalizimi do të japë rezultate në këtë aspekt.
“Fiskalizimi pritet të rrisë të ardhurat. Kemi parashikuar rritje natyrale të të ardhurave si pasojë e rritjes ekonomike. Janë të parashikuara edhe efektet e paketës fiskale. Politikat e investimeve publike, ne presim që të vijojnë investimet që kanë filluar gjatë viteve të kaluara, sa i takon rrugëve dhe Ujësjellësave. Këtë vit rritja ka ardhur si pasojë e rritjes në të gjithë sektorët, përveç bujqësisë. Kemi pasur rritje të konsumit, por edhe të investimeve. Parashikimet për vitin 2022 deri në 2025 janë të bazuara në strukturën e ekonomisë shqiptare. Këto parashikime janë në linjë me FMN dhe BSH,” u shpreh ministrja.
Si të papërgjegjshëm e ka cilësuar deputeti i PD, Bujar Leskaj projektbuxhetin e vitit 2022, ndërsa tha se qeveria nuk ka mbajtur premtimin për uljen e këtij borxhi.
“Ky është buxheti më i papërgjegjshëm dhe vazhdon në vijimësi të buxheteve të kësaj qeverie. Nuk mund të flasim dhe të theksojmë për buxhet kredibël ku vazhdojmë dhe thellojmë borxhin publik. Në programe ju si pari dhe qeveri keni vënë një objektiv madhor që do e kalonit borxhin publik në 60%. Tani e keni thënë që në 2025 pritet të shkojë në 79%. Kemi një mos mbajtje premtimi me mbi 2 miliard euro. Ju si ministre a shqetësoheni për këtë mos mbajtje premtimi? Deklaroni se do të ketë shtim të të ardhurave dhe në korrik e rishikoni. Më bën të mendoj se i vendosni këto shifra nën presionin politik,” u shpreh ai.
Më tej, deputeti u ndal tek Eurobondi, ku kërkoi nga ministrja më shumë detaje se ku do të përdoret.
“Një merak, ne e folëm për Eurobondin dhe ende në materialet tuaja kam parë një togfjalësh që do përdoret për mbështetje buxhetore. Mund të na tregoni me shumat përkatëse ku do përdoret ky Eurobond. Nuk mund të vazhdoni ta kaloni me një togfjalësh. Ky buxhet që ju keni përgatitur a ka parashikuar ndonjë zgjidhje apo përpjekje për uljen e informalitetit?“, tha Leskaj.
Leskaj theksoi gjithashtu se duhet bërë më shumë për dëmshpërblimin e ish-të përndjekurve politikë.
