Sekretari i Përgjithshëm i LSI-së, Endrit Braimllari, ka treguar sot gjatë një interviste televizive se nuk ka pasur më asnjë takim mes partive opozitare që pas 25 prillit. Ai kritikoi edhe qëndrimin e PD që grisi fletët e votimit në momentin e zgjedhjes së kryetares së Kuvendit. Ndërsa, kushtin e PD-së për tre nismat kushtetuese në këmbim të zgjatjes së afateve të vettingut, Endrit Braimllari e shikon si Pazar.
“Pas 25 Prillit nuk ka asnjë takim të përbashkët të të gjitha partive opozitare. Ne ishim bllok opozitar. Komunikim Basha-Kryemadhi? Pas 25 Prillit nuk ka komunikim. Nuk tregohet forca duke grisur letrat përballë një zonje. Sjellja në këto momente lë hije dyshimi të mëdha për një pazar. Nuk ka një arsye”, tha ai.
Gjithashtu, ai dha detaje edhe për vizitën e kryetares së partisë, Monika Kryemadhi në Amerikë. Ai tha se Kryemadhi do të takojë atje persona të rëndësishëm, me të cilët ka pasur disa takime edhe para 25 prillit. “Për aksionin e Kryemadhit mund të flas, ka shkuar në SHBA, ka takime zyrtare me persona të rëndësishëm të senatit dhe kongresit. Këto takime i ka zhvilluar periodikisht edhe para 25 Prillit”, theksoi ai.
Sakaq, Braimllari u shpreh se LSI nuk sheh më ndonjë bashkëpunim të fortë me PD dhe se nuk të ndjekë më gabimet që bën Basha, të cilat paralizojnë të gjithë opozitën.
