Shefi i grupit parlamentar të LDK-së në Kuvend, Arben Gashi, ka treguar se ish i Dërguari Special i Shtëpisë së Bardhë për dialogun Kosovë-Serbi, Richard Grenell, u kishte dhënë LDK-së 7 ditë kohë që të rrëzojnë qeverinë Kurti 1.
Sipas Gashit, është shmangur rrëzimi i qeverisë, pasi pasojat do të ishin të mëdha për shtetin e Kosovës.
“Ka mundur të shmangej, por rreziqet kanë qenë të mëdha, nuk mund të krijoj një paralele tani se çfarë do të ndodhte, por sinjalet kanë qenë jashtëzakonisht të rrezikshme. Ne kemi vendosur mbi bazën e informacioneve dhe sinjaleve që kemi pasur, pra të vetëdijshëm për pasojat që mund të kishim”, tha ai.
Ndër të tjera, Gashi tha se dy kanë qenë situatat në tavolinë për t’u analizuar.
“Kemi pasur dy situata në tavolinë të cilat i kemi analizuar. Situata e parë ka qenë prej qeverisë, dhe lënia e kryeministrit Albin Kurtit në ballafaqimin me situatën, duke lënë qeverinë të përballej me një konflikt të mundshëm me SHBA dhe ne të tërhiqeshim në zonën e sigurt. Nga ana tjetër, të merrnim përsipër rrëzimin e qeverisë me koston që pothuajse është e pamundur për një kohë të shkurtër të shpjegoheshim para qytetarëve, duke marrë parasysh pandeminë, bllokimin e njerëzve, pamundësinë e komunikimit, dëshpërimin e përgjithshëm dhe shumë faktorë”, u shpreh ai.
Sipas tij, urdhri ka qenë i qartë, duhej të rrëzohej qeveria e re për shtatë ditë, një gjë e tillë shprehet ai është konfirmuar edhe nga ambasadori amerikan.
