I shumëkërkuari Riad Sopjani 20 vjeç ka rënë në prangat e policisë në Durrës. Arrestimi i të riut është bërë në kuadër të operacionit të koduar “Arratia” me qëllim ekstradimin drejt Kosovës pasi ishte shpallur në kërkim ndërkombëtar.
Sopjani, 20 vjeç, banues në Prishtinë do të përballet me akuzat për grabitje, vjedhje dhe trafikim të qenieve njerëzore.
Gjatë kontrollit të ushtruar në banesën ku ai strehohej në Durrës, gjetën dhe sekuestruan në cilësinë e provës materiale një sasi lënde narkotike cannabis sativa.
Policia thekson se ka qenë në kërkim në nivel vendor në Kosovë dhe ka tre urdhra ndalimi të lëshuara nga Gjykata Themelore e Prishtinës. Sopjani është arratisur nga Qendra Korrektuese e Lipjanit, në tetor 2020.
Në përfundim të veprimeve të para të kryera nga strukturat hetimore të DVP Durrës u bë arrestimi provizor i tij, me qëllim ekstradimin në shtetin e Kosovës, mbështetur në “Konventën Evropiane të Ekstradimit” të vitit 1957.
