Ditën e sotme, policia e Fierit ka vënë në pranga një 33-vjeçar për ushtrim aktiviteti të paligjshëm të lojërave të fatit.
Sipas njoftimit të Policisë së Shtetit, i prangosuri i identifikuar me inicialet R.D., banues në fshatin Petovë, shfrytëzonte lokalin e tij për të vendosur baste nëpërmjet një telefoni.
Policia e Shtetit ka zhvilluar vazhdimisht aksione goditjen e veprimtarisë së lojrave të fatit në të gjithë vendin.
Gjatë operacioneve të zhvilluara janë përfshinë 1100 punonjës policie, konkretisht nga Sektorët për Hetimin e Krimit Ekonomik e Financiar në çdo DVP, Forca e Posaçme “Shqiponjat”, Patrullat e Përgjithshme dhe disa grupe të FNSH-së, nën drejtimin e Departamentit të Policisë Kriminale në Policinë e Shtetit.
Në të gjithë vendin janë kontrolluar 656 ambiente në të cilat dyshohej se mund të ushtrohej aktiviteti i kundërligjshëm i lojërave të fatit, kryesisht në fushën e basteve.
Nga kontrollet e ushtruara në të gjithë vendin janë arrestuar në flagrancë 35 persona, konkretisht 19 persona në Tiranë, 6 persona në Vlorë, 5 në Shkodër, 2 në Durrës, 1 në Bulqizë, 1 në Fier e 1 në Korçë.
Janë proceduar penalisht në gjendje të lirë 18 persona, konkretisht 5 persona në Korçë, 3 në Tiranë, 3 në Shkodër, 2 në Vlorë, 2 në Berat, 1 në Elbasan, 1 në Mat dhe 1 në Fier.
