Deputeti Demokrat Xhelal Mziu nuk ka qenë sot i pranishëm në “Foltoren” e Berishës në Kamëz. Ai e kishte paralajmëruar më parë mungesën e tij, edhe pse për disa vite ai ka qenë drejtues i kësaj bashkia nga radhët e PD. Dje ai u shpreh se nuk do të jetë pjesë e Foltores që zhvillohet në Kamëz. Mziu tha se, kushdo që shkon në Foltore e dëmton Partinë Demokratike pasi shton më shumë përçarjet, duke nënkuptuar një thirrje për mbështetësit demokratë të Kamzës që të mos i bashkohen Berishës.
“Takimi do të jetë do të ketë pjesëmarrje e entuziazëm, është një zonë me shumicë bindje të djathtë, e për shkak origjinës dhe persekutimit që kanë pasur. Do të ketë pjesëmarrje, unë nuk do të jem pjesë e kësaj, nuk është se kam gjë me qytetarët e Kamzës, unë i quaj pjesë organike të jetës sime. Jo se nuk kam ndonjë gjë me Sali Berishën, por e gjykoj pjesëmarrjen e personave me një mandat politik, sikur ndikon pozitivisht në hendekun e PD-së, ose sikur i hidhet benzinë zjarrit të ndezur”, tha Xhelal Mziu ditën e djeshme.
Ndërkohë, Sali Berisha nuk ka dhënë asnjë përgjigje për këtë deklaratë të Mziut.
