Guvernatori i Bankës së Shqipërisë, Gent Sejko, në konferencën e ditës së sotme tregoi se inflacioni vazhdon të ketë luhatje dhe kjo do të reflektohet në rritjen e kostove për transportin, çmimet për ushqimet, naftën dhe energjinë. Sipas tij, deri në 2020 rritja në këto sektorë është e pashmangshme, për shkak se e njëjta gjë po ndodh edhe në tregjet botërore.
“Inflacioni erdhi në rritje gjatë tremujorit të tretë, duke shënuar nivelin mesatar prej 2.4%. Kjo ecuri pasqyroi në masën më të madhe goditjet e ofertës të ardhura nga rritja e çmimeve të ushqimeve, të energjisë, të naftës dhe të kostove të transportit, në tregjet botërore”, u shpreh ai.
Ndër të tjera, ai tregoi se pagat dhe punësimi vazhdojnë të ecin në ritme të papërfillshme dhe mbeten në nivel shqetësues. “Ndonëse në rritje, presionet e brendshme për rritjen e pagave, punësimit dhe të inflacionit janë ende të moderuara. Ekonomia shqiptare do vazhdojë të rritet në horizontin afatmesëm e mbështetur nga stimuli monetar, duke krijuar premisa për kthimin e qëndrueshëm të inflacionit objektiv brenda vitit të ardhshëm”, tha ai.
Sakaq, ai tha se Këshilli Mbikëqyrës i Bankës së Shqipërisë pasi diskutoi zhvillimet ekonomike e monetare në vend dhe ecurinë e pritshme të tyre, vendosi të mbajë të pandryshuar normën bazë të interesit për lekun në nivelin 0.5 %
Discussion about this post