Në lidhje me shkarkimin e zëvendës ministrin Oltion Rrumbullakut ditën e sotme, ka reaguar deputetja e Partisë Demokratike, Ina Zhupa.
Në një postim në facebook, Zhupa thotë se në orën 12:00 ministrja e arsimit Kushi u largua se do shkonte në mbledhje qeverie dhe la të përgjigjej zëvendës ministri Rrumbullaku për pjesën e mbetur, ndërkohë që shkoi në mbledhjen tjetër për ta shkarkuar.
Ajo më tej thotë se kjo është një qeveri barsoletash, pasi sipas saj, ministren nuk e pyet njeri për shkarkimin e zëvendësit të saj.
“Qeveria e barsoletave! Sot ne komision në orën 12:00 ministrja e arsimit Kushi u largua se do shkonte në mbledhje qeverie dhe na la të përgjigjej zëvendës ministri Rrumbullaku për pjesën e mbetur. E delegoi ne mbledhje për të na dhënë përgjigje para komisionit, ndërkohë që shkoi në mbledhjen tjetër për ta shkarkuar!
Ose ministren e arsimit nuk e pyet njeri dhe as nuk kishte ide që do e shkarkonin zëvendës ministrin e saj, ose ajo është tallur me parlamentin duke lënë në raportim dikë që ishte në shkarkim! Te dyja tregojnë nivelin e përgjegjshmërisë dhe profesionalizmin e kësaj qeverisje!” – shkruan Zhupa.
Vendimi për lirimin nga detyra të Oltion Rrumbullaku, zëvendësministër i Arsimit dhe Sportit, është bërë me propozim të kryeministrit Edi Rama dhe është miratuar nga Këshilli i Ministrave. Oltion Rrumbullaku gëzonte postin si zv.Ministër i Arsimit që në dhjetor të vitit 2019, ndërkohë që kujtojmë se kjo nuk është lëvizja e vetme që po bëhet në Ministrinë e Arsimit.
Ditën e djeshme, ministrja e Arsimit, Evis Kushi shkarkoi nga detyra drejtoreshën e Shërbimeve Arsimore, Rezana Vrapi e cila u zëvendësua nga Aurora Balliu.
Discussion about this post