Qeveria miratoi ditën e sotme disa ndryshime në ligjin për noterinë, ku mes të tjerave ka vendosur që edhe këta të fundit të kalojnë nën sitën e vettingut. Në një lidhje me këtë çështje ka reaguar zëvëndëskryetari i Dhomës Kombëtare të Noterëve, Fatmir Laçej. Përmes një interviste televizive ai tha se noterët duhet të japin kontributin në parandalimin e çdo lloj veprimtarie të pastrimit të parave dhe financimit të terrorizmit. Ai e përshëndet projektligjin e ri, duke thënë se është hartuar në bazë të rekomandimeve të KE.
“Ky projektligj është garantuar në bazë të rekomandimeve të Këshillit të Evropës dhe duhej prej kohësh. Noteri është aktor i rëndësishëm i këtij sistemi, i cili lufton që në të gjithë veprimtarinë e tij të finalizojë dhe të bëjë sa më formale ekonominë në vend. Të gjitha transaksionet kalojnë përmes dorës së noterit dhe padyshim që janë noterët ata që duhet të ndikojnë dhe të japin kontributin në parandalimin e çdo lloj veprimtarie të pastrimit të parave dhe financimit të terrorizmit.”
Laçej tha se tashmë noterët aktual do t’i nënshtrohen një lloj procesi kontrolli dhe se do të përcaktohen kritere për noterët e rinj që do të futen në këtë profesion, duke sqaruar pikat ku do të hetohen noterët.
“Kriteret janë ata të kontrollit paraprak për të gjithë ata që pretendojnë të futen në profesionin e noterit, por edhe për ata që janë vetë noter. Përveç dëshmisë gjyqësore, do të jenë edhe kriteret e tjera, siç janë etika në profesion, lidhjet me elemente që janë kriminalë”, u shpreh ai. Ndërsa pak or më parë, ministri Manja tha se ky projektligj do të ketë parasysh nxjerrjen jashtë këtij sistemi të noterëve që gjenden në kontakte të papërshtatshme me krimin e organizuar apo me të dënuar për vepra të rënda.
Discussion about this post