Ministrja Ogerta Manastirliu ka pohuar se Shqipëria është ndër vendet që ka bërë porosinë për sigurimin e pilulës “Mulnopiravir”. Manastirliu tha se përmes lidhjeve dhe instrumenteve të përbashkët të krijuar dhe nga BE, qeveria shqiptare është në listën e vendeve në pritje.
Kjo pilulë redukton vdekjet në 50%.
“Ne kemi marrë kontakte me “Merck”. Po ashtu kemi marrë kontakte me Pfizer, pasi dhe ai është duke prodhuar një bar që quhet proteaz. Janë duke eksploruar këto barna, që do të ndryshojnë kohën, do jenë mbështetjet për vaksinat. Do të reduktojë 50% të fazave të rënda dhe hospitalizimeve. Kemi krijuar lidhjet tona përmes instrumentit të përbashkët që ka vendosur BE, të jemi dhe ne në këtë listë. Kemi përcaktuar ato detaje të sasive dhe procedurave që do të ndjekim. I kemi marrë masa, që edhe për terapitë inovatore, që shpresojmë që të kenë efikasitetin e duhur”, u shpreh Manastirliu.
Ndër të tjera ministrja ka folur rreth buxhetit, madje duke pohuar se do të ketë rritje të pagave të mjekëve dhe infermierëve. Spitalet rajonale tashmë janë specifikuar e nuk i dërgojnë më pacientët e tyre drejt kryeqytetit.
Manastirliu ka përmendur zhvillimin që kanë marrë spitalet e rretheve, por denoncimet e qytetarëve janë të pafundme. Pamja që ofrojnë spitalet në vend nuk është aspak ashtu siç e përmendin politikanët. Deputeti Saimir Korreshi është njëri prej denoncuesve më të mëdhenj të gjendjes që ndodhen institucionet shëndetësore në Lushnje. Në atë çka bëri me dije demokrati, situata ishte një katastrofë e vërtetë me infrastrukturë zero dhe ambulanca jashtë funksionit.
Discussion about this post