Deputetja e Partisë Demokratike, Orjola Pampuri, ka reaguar prë garën e hapur për kryetaren e re të Lidhjes Demokratike të Gruas.
Sipas Pampurit, nuk ka asgjë anti-demokratike në vendimin e kryetarit të PD për të zgjedhur Kryetaren e re të Lidhjes Demokratike të Gruas. Si përgjigje ndaj koleges së saj, Albana Vokshi, e cila është shprehur kundër kësaj procedura, Pampuri i kujton se mandati i ka mbaruar prej 8 vitesh.
“Nuk ka asgjë anti-demokratike në vendimin e Kryetarit Basha për të zgjedhur Kryetaren e re të LDG dhe strukturat inekzistente drejtuese të Lidhjes. Zgjedhja e kryetares së LDG-së me parimin “një anëtar, një votë” është një lajm i mirë për të gjitha gratë dhe vajzat demokrate, që besojnë tek PD dhe duan të japin kontributin e tyre.
Zonja Albana Vokshi është emëruar në ketë detyrë që në vitin 2009 nga Kryetari i PD, pa garë. Mandati i saj ka skaduar prej të paktën 8 vitesh dhe askush nuk mund të pretendojë për legjitimitetet apo demokraci në drejtimin e LDG” – shkruan Pampuri.
Ajo më tej thotë se shumë pak e dinë që LDG nuk ka pasur në 12 vjet asnjë strukturë përveç kryetares me mandat të skaduar.
“Shumë pak e dinë, por LDG nuk ka patur në 12 vjet asnjë strukturë përveç Kryetares me mandat të skaduar. Zonja Vokshi nuk e miratoi kurrë statutin e LDG, siç e urdhëron Statuti i Partisë, nuk hapi kurrë garë për asnjë strukturë drejtuese të Lidhjes. Nën drejtimin e znj. Albana Vokshit, LDG nuk ka patur as Sekretare të Përgjithshme, as Nënkryetare, as Kryesi, as Këshill Kombëtar. Ky mund të jetë akti më antidemokratik që mund të bëhet ndaj një forumi politik.
Pas procesit të nisur sot nga Kryetari Basha do të sigurohet zbatimi korrekt i statutit të PD, në mënyrë që organizimi i LDG të jetë i ngjashëm me atë të PDSH. Për këtë arsye, Kryesia e PD do duhet të miratojë edhe Statutin për funksionimin demokratik të LDG për t’i dhënë fund praktikës antidemokratike të uzurpimit të Kryetares së Lidhjes për 12 vjet, pa votë” – shkruan më tej Pampuri.
Kujtojmë se ditën e sotme, kreu i Partisë Demokratike hapi garën edhe për kryetaren e re të Lidhjes Demokratike të Gruas, një ditë pasi sh[alli zgjedhjet edhe për kreun e ri të FRPD. FLD është drejtuar nga deputetja Albana Vokshi, e cila është shprehur kundër këtij vendimi.
Discussion about this post