Në automjetin tip “Range Rover”, të noteres Rezarta Koçi, u vendos 100 gram tritol, që shkaktoi shpërthimin dy ditë më parë në Komunën e Parisit në Tiranë. Këtë informacion e bën të ditur grupi hetimor, për gijotina.com.
Edhe pse eksplozivi ka qenë në sasi të vogël, dyshimet janë se ka qenë një formë paralajmërimi për noteren.
Sakaq, burime për gijotina.com bëjnë me dije se Koçi, është marrë në pyetje nga policia ditën e djeshme, ku përpara hetuesve ka treguar edhe personat me të cilët ka pasur probleme. Por për shkak të hetimeve, emrat e tyre nuk janë bërë ende publik.
Ndërsa janë sekuestruar dhjetëra kamerat e sigurisë, për të parë se kush ishin personat që i vendosën lëndën plasëse në makinën e noteres.
Pista kryesore e hetimit, janë konfliktet e mëparshme të Koçit. Sipas informacioneve, që prej 2019-ës ndaj noteres janë kryer 4 kallëzime për vepra të ndryshme penale. Shpërdorim detyre, mashtrim, fshehje e të ardhurave dhe mospagim i taksave dhe tatimeve.
Rezarta Koçi dyshohet se u ka përvetësuar 4 kallëzuesve shuma të konsiderueshme parash, një hotel dhe kontrata shitje të pasurive të paluajtshme. Nisur nga këto kallëzime të bëra në vitin 2019, hetuesit dyshojnë se ato janë pikërisht shkaku i vendosjes së tritolit.
Discussion about this post