Ministrja e Shëndetësisë, Ogerta Manastirliu, ishte e pranishme në Komisionin për Punën, Çështjet Sociale dhe Shëndetësinë ku deklaroi se spitali Memorial Rajonal Fier do të financohet me një fond shtesë, për t’i hapur rrugë një modeli të ri të autonomisë spitalore.
“Do të financojmë spitalin Memorial në Fier, duke garantuar ofrimin e shërbimeve terciare për më shumë se 330 mijë banorëve të zonës së jugut. Por gjithashtu sipas sistemit të referimit edhe për të gjithë qytetarët e tjerë të cilët kanë nevojë që të marrin shërbime të nivelit terciar në këtë spital”, tha Manastirliu.
Ministrja tha se buxheti për programin e kujdesit spitalor do të jetë 31 miliard e 763 milionë lekë për të mbështetur garantimin për mbulimin falas të disa paketave mjekësore por edhe shërbimeve të ndryshme në sistemin tonë spitalor.
“Programi i kujdesit spitalor do të ketë një buxhet prej 31 miliardë e 763 milionë lekë pa përfshirë këtu kontributet e sigurimeve shoqërore të cilat në vitin 2022 planifikohet të jenë 15 miliard lekë. Me buxhetin 2022 do të garantohet mbulimi 100% falas i paketave mjekësore, duke përfshirë dializën, transplantin e veshkave, të gjithë paketën e kardiologjisë dhe kardiokirugjisë, të radioterapisë, kataraktit, për mbi 15 mijë pacientë në vit. Do të vijojë fuqizimi i spitaleve universitare, rajonale, bashkiake me aparatura mjekësore, pajisje biomjekësore të teknologjisë së avancuar”, tha ajo.
Duke folur për shërbimin laboratorik, Manastirliu bëri me dije se do të sigurohet mbulimi i shërbimeve të diagnostikës laboratorike në çdo spital universitar, rajonal dhe dy spitalet bashkiake.
Discussion about this post