Vendi do të shkojë në zgjedhje me Qeveri teknike. Kështu u shpreh deputeti demokrat Flamur Noka mbrëmjen e së mëkurës në “Open” duke shprehur bindjen se Edi Rama do të gjunjëzohet nga aksioni opozitar.
“Aksioni i Grupit Parlamentar në Kuvend do të vazhdojë. Kemi tre mbledhje që po diskutojmë për të gjetur një formë diversifikimi të këtij aksioni brenda parlamentit.
Ai Parlament ose do ti kthehet legjitimitetit, ose nuk do funksionojë normalisht. Ose do respektojë opozitën ose nuk do ekzistojë.
E dyta kemi diskutuar edhe vazhdimin e këtij aksioni në terren. Ne shumë shpejt do të zbresim në terren. Ne ndërpremë zbritjen në terren sepse duhet të përmbyllnim procedurat statutore.
Ne 20 shkurti na ka dhënë një mesazh të madh. 20 shkurti kishte një energji të pashtershme, ishte një protestë, por ishte edhe një mesazh për ne, për të vazhduar betejën me regjimin. Ne duhet të rikthejmë shenjtërinë e votës”, tha Noka.
Ai shtoi se në Shqipëri të gjitha institucionet janë të kapura, në Shqipëri demokracia është në ditën më të zezë. I pyetur se si do të arrijë opozita te Qeveria teknike, Noka theksoi se do të konsultohemi me demokratët, me qytetarët, do të përshkallëzojmë aksionin në terren dhe do ta detyrojmë jetë qeveri që të gjunjëzohet. “Ju garantoj që Shqipëria do shkojë në zgjedhje me qeveri teknike”, theksoi ai.
Por a do të marrë pjesë opozita në zgjedhje, nëse nuk arrihet Qeveria teknike?
Flamur Noka shprehet i bindur se vendi do të ketë Qeveri teknike dhe opozita do i fitojë zgjedhjet.
“Ne do të shkojmë në zgjedhje, ne do ti fitojmë ato zgjedhje dhe do shkojmë në zgjedhje me qeveri teknike”, shtoi ai.
Discussion about this post