Kreu i PD, Sali Berisha, në një prononcim për median, vlerësoi kontributin e Gazment Bardhit në krye të grupit parlamentar, duke theksuar se funksionet në Partinë Demokratike përcaktohen përmes proceseve demokratike dhe respektimit të rregullave të brendshme.
“Unë nuk po prononcohem mbi vendimmarrjen, sepse kjo është në dorën e grupit parlamentar, por mund të them qartë se Gazment Bardhi e ka kryer me dinjitet dhe përgjegjësi detyrën e tij,” tha Berisha.
Ai shtoi se të gjitha funksionet në PD do të përcaktohen në vazhdim përmes procedurave të rregullta dhe transparente.
“PD do i ketë në vazhdim proceset. Do i përcaktojë grupi të gjitha…
Unë nuk po prononcohem, por unë kam vlerësim qartësisht për detyrën që Gazment Bardhi ka kryer si kryetar grupi.
Por një gjë, funksionet ne i përcaktojmë në mënyrë demokratike.
Ka rregulla aty dhe do zbatohen ato rregulla.
Por Gazment Bardhi, meqë po më pyet mua, gjykoj se e ka kryer me dinjitet dhe e përmbush me dinjitet atë detyrë.
Do jetë grupi që përcakton se kush do jetë kryetari i grupit…
A ka mundësi që sekretin e votës të ma respektosh? Të vetmen gjë…”
Më tej, teksa u pyet nëse do të hap seancën plenare më 10 shtator, si deputeti më i vjetër në Kuvend, ai theksoi se nuk do ta bëjë.
“Një parlament jolegjitim nuk mund ta hap kurrë. Nuk mund t’i bëj vendit tim një antishërbim të tillë. Harrojeni! Po të ishte legjitim, me kënaqësi do ta bëja. Por ky është një parlament jolegjitim, nuk përfaqëson vullnetin e qytetarëve shqiptarë, sipas dokumenteve kombëtare dhe ndërkombëtare. Rekomandimi i Këshillit të Evropës thotë se në Shqipëri duhet të ndahet partia nga shteti, kjo mjafton. Si mund ta hap unë atë? Si mund t’ia lejoj vetes të ulem aty? Kurrë”, tha Berisha.
Discussion about this post