Sali Berisha, kreu i demokratëve dhe ish-Kryeministër, u shpreh mbrëmjen e sotme se vajza e tij, Argita Malltezi nuk do të garojë përballë babait të saj për postin e kreut të PD-së. Por Berisha nuk përjashtoi kandidimin e Malltezit për çdo post në parti, pas largimit të tij si kryetar.
I pyetur nga gazetari Lorenc Vangjeli, në Syro TV, për fjalimin e Argita Malltezit në Kuvendin Kombëtar të PD, Berisha tha “se çfarë do të bëjë Argita Malltezi në të ardhmen e saj, unë nuk mund ta them, dhe këtë ta them haptas. Por për një gjë të jeni i sigurtë, që nuk do të jetë ajo që do të garojë me të atin e saj. Për këtë 100%”.
“Unë kam kodin tim, që i përmbahem.
Pas meje unë nuk jam përgjegjës se çfarë mund të ndodhë. Unë them që ajo është një njeri që ka të drejtën si çdo demokrate e demokrat, të marrë pjesë në garat, cilat të dojë.
E vetmja gjë që nuk mund të ndodhë është që ajo të garojë me ta atin e saj.
Kjo nuk ndodh. Nuk mund të bëhet partia familje”, tha Berisha.
Lidhur me komisionet hetimore, Berisha tha se ato janë hallka e fundit e kontrollit të qeverisë.
Berisha theksoi, se drejtësia nuk e kontrollon më Ramën, pasi raportet e Kontrollit të Lartë të Shtetit i hedhin në plehra.
“Rama ka mbledhur pardje Fatmir Xhafën, Arben Rakipin, Taulant Ballën dhe kanë hartuar ligjin për të përjashtuar për 2 muaj deputetët nga parlamenti. Ai po shkelmon sovranitetin e brendshëm të vendit, në kuptimin e sovranitetit si fuqi e qytetarëve për të kontrolluar qeverinë. Ato komisione ngelën të fundit. Drejtësia nuk e bën më, raportet e Kontrollit të Lartët të Shtetit i hedh të gjitha në kosh, nuk pyet fare nëse ekziston. Ai ka dalë tani mbi çdo lloj kontrolli të çdo lloj natyre dhe vendos kontrollin e tij personal. Absolutarizmi është kur pushteti vendoset në një dorë, të gjitha pushtetet në një dorë”, tha Sali Berisha.
Discussion about this post